«Мақал сөздің азығы, жұмбақ ойдың қазығы»
Мақсаты: Мақал - мәтел – ата бабамыздан қалған өшпес мұра. Көлемі жағынан шағын болғанмен, мағынасы терең, құны қымбат қазына. Мақал - мәтел – тәрбиелік мәні зор, рухани байлық туралы мағлұмат беру. Білімдерін жүйеге келтіріп пысықтау, мақал – мәтелдерді орынды қолдану дағдыларын қалыптастыру. Тіл – қай ұлтта қай елде болса да құдіретті, қастерлі. Ана тілімізді дамытып, орыс тілін қолданып, ағылшын тілін үйренеміз деген мақсатпен оқушылардың қызығушылықтарын арттыру.
Дамытушылық: Ойлау, есте сақтау, ой түйіндеу, ауыз екі сөйлеу, ой – өрісін кеңейту.
Тәрбиелік: Шешендік сөйлеуге, сөз астарын мағыналы түрде сипаттап көрсету, салауаттылыққа тәрбиелеу.

«Мақал – сөздің мәйегі», «Тұз астың дәмін келтірсе, мақал сөздің сәнін келтіреді», - деген қанатты сөздермен «Мақал сөздің азығы, жұмбақ ойдың қазығы» атты сабағымызды бастаймыз.

Ойын барысы:..
Ойынға 2 топ қатысады. Ойын 3 айналымнан тұрады.
1. «Ойлы болсаң, озып көр» (Мақал айту сайысы)
2. «Тапқыр болсаң тауып көр» (Берілген жұмбақтарды шешу. Оны қазақша, орысша, ағылшынша жауап беру)
3. «Біз білмейтін бір мақал» (Мақалдың мағынасын ашу)
Ойын барысы түсінікті болса, сайысымызды бастаймыз, қатысушыларға сәттілік.

І айналым «Ойлы болсаң, озып көр»

«Сұңқар» тобы
1. Көз – қорқақ, қол батыр.
2. Отансыз адам, ормансыз бұлбұл.
3. Жақсыдан үйрен, жаманнан жирен.
4. Кітап – білім бұлағы, білім – өмір шырағы.
5. Еңбек етсең ерінбей, тояды қарның тіленбей.
«Тұлпар» тобы
1. Ақылы көпті дау алмайды, досы көпті жау алмайды.
2. Еңбектің наны тәтті, жалқаудың жаны тәтті.
3. Отан – оттанда ыстық.

5. Еңбек ердің көркі, ер елдің көркі.

ІІ айналым «Тапқыр болсаң тауып көр»

Бұл айналымда жұмбақ жасырамын, сендер жұмбақтың шешуін айтуларың керек.

1. Үш көзді батыр, жолды аңдып жатыр. (бағдаршам)

2. Өзі кірді ашады, суға салсам қашады. (сабын)

3. Күнде оған қараймын, қара шашты тараймын. (айна)

4. Қабат-қабат қаттама, ақылың болса аттама. (кітап)

5. Қыстай жегіп қос атты, көктем шыға босаттым. (шана)

6. Қардай аппақ, балдай тәтті ақ. (қант)

7. Таңмен көзін ашады, әлемге нұрын шашады. (күн)

8. Ұзын мойны, екі ішек, қатар-қатар тепкішек. (домбыра)

9. Қызыл, сары, жасылды, көкте бір зат асылды. (кемпірқосақ)

10. Керек санды тересің, елге сәлем бересің. (телефон)

11. Басында мүйізі бар, үстінде киізі бар. (сиыр)

12. Далада жүр шапқылап, керемет бір саққұлақ. (қоян)

13. Түрі жылқы бинесі, жолақ-жолақ жидесі. (зебра)

14. Аяғы бар басы бар, арқасында тасы бар. (тасбақа)

15. Орманда оның тұрағы, тоқ-тоқ етіп тұрады. (тоқылдақ)

ІІІ айналым: «Біз білмейтін бір мақал» Мағынасын ашу
1 - топ: 1. Қараңғыда тапқаныңды ханға берме, Жарықта тапқаныңды жанға берме.
Мағынасы: еңбекпен тапқаныңды орынсыз шашпа.
2 - топ: 2. Шын ер жеңсе, тасымас, Жеңілсе, жасымас.
Мағынасы: Қандай жағдай болса да өз — өзіңді сабырлы ұстап үйрен.

Қорытынды: Қорытындылай келе «Сұңқар» тобың шапшаңдылығы мен ақылдылығы басым болып жеңіске жетеді.
Жеңген топты марапаттау.

Ата - салтым, асыл мұрам, ардағым,
Бабалардың жалғастырар арманын
Сан ғасырда қалпын бұзбас, қадірім,
Өткенімді бүгініммен жалғадым – дей келе бүгінгі сайысымыз аяқталды.
Ұлттық өнерімізді ұрпақтан ұрпаққа жеткізетін біздер, сондықтанда құнды мұраларымызды насихаттап жүрейік.